Im fougende Bitrag erfahrsch du ob mir dr gross ersehnt Houptgwinn vo öire Win for Life-Aktion abgstoubet hei.

So lang ufnes Lama ischla bises kaputt geit – so het dr Uftrag vo üsne Trouzüge glutet. Zum Glück si üs d Ouge verbunde worde, süsch hätts sicher öpper vo üs beidne nid über z Härz bracht, däm härzige Lama ä Schlag z verpassä.

Voller Motivation, Kraft und bescheidenem Teamwork hei mir druf los gschlagä und hei mit öppe 3fach so langer Zit und dank öire Hiuf s de doch no gschafft ds Lama z zerschmättere und a Inhalt z cho. Die riesigi Mängi a Win for Life-Lösli hei üs überwäutiget und scho isch ds Chopfchino los gangä was mir de mitemne grossä Gwinn aus wei machä (äs Feriehus choufe in Mallorca, ä Tiergnadehof gründä, ä Airline gründe).

Zersch simer aber im Aschluss a üses Hochzit no id Flitterwuche uf Sardinie.
Um de o gnueg Energie z ha für so viu Lösli ufzrubble, hei mir äxtra jede Tag Pasta gässä – 2 mau.

Wieder zrugg in Ittige heimer üs voller Motitvation und Zueversicht hinger die Los gmacht .
Drmit mir no möglechst lang öppis drvo hei, hei mir beschlosse, jede Abä 2 Lösli pro Person ufzrubble. Das het es paar Täg o würklech guet klappet. Nachere gwüsse Zit heimr de 2 Bärge gha a Lösli: dr Nietebärg und dr Gwinnbärg. Da leider nur eine vo beidne Bärge beachtlech isch agstige und mir o mau wieder äs Erfougserläbnis hei brucht, heimer de entschide, d Mängi vo dä Los pro Tag z steigere. So simer de o nach 2 Wuche scho bereits düre gsi mitem Ufrubble vo aunä Lösli und chöi öich die fougendi Bilanz präsentiere:

D Höchi vom Gwinnbärg isch: CHF 255

Wie dir gseht, hets zwar nid fürne Houptgwinn glängt, aber dank öich hei mir no zimli lang jede Abe es Highlight gha und es het gfägt, jedes Mau d Hoffnig z ha, die blaue Peperoni doch no z becho.
Insgsamt isch ä schöne Betrag zäme cho u drum bruche mr iz öii Hiuf wie mir dä söue investiere. Bitte stimmet schnäu ab:

O wenn mir nid dr Houptgwinn hei chönne abstoube, witerhin üsne Jobs nache gö und dr Tiergnadehof uf 2 Chatze und es paar Spinnele beschränkt blibt, füehle mir üs trotzdäm aus Gwinner.

Mir hei äs wunderbars Hochzit gha mit öich aune – üsne liebstä Lüt.

Dir heit üs aui mit liebä Kärtli, kreative Gschänk, grosse Biträg ad Flitterwuche und/oder Lösli ä riese Fröid gmacht, mir wärde üs no lang mit grosser Fröid a dä Tag mit öich zrugg erinnere.

Merci viu mau!

Lily & Simon